至尊滿屋日本料理 (已結業)

周圍個個朋友去旅行，我唯有食下日式放題過下癮先。因為友人九龍返工，所以揀左呢間至尊滿屋日本料理，其實之前食過一次，佢地嘅waiter好nice，手腳快之餘，都好有禮貌，又少漏單，所以印象幾好。呢到座位都幾多，都坐得幾舒服，果日我地落完單無幾耐，都好快坐滿左8/9成，可能因為抵食。有9張紙揀野食，選擇都幾多，因為我同友人得兩個人，但又樣樣都想食，所以都揀左好一陣。落完單，緊係出去拎飲品同甜品，食住等。鮑片好好味，夠彈牙又唔會太韌；大赤蝦大大隻，幾鮮甜，同友人都好鐘意，encore左兩轉。螺刺身幾有咬口，會忍唔住夾黎食。豉椒炒蜆好入味，少少辣，好惹味，啱晒送啤酒。平時好少食瀨尿蝦因為剝殼麻煩，而家有搞掂晒嘅瀨尿蝦壽司緊係要食，都幾好味，最正係唔麻煩。鰻魚壽司多左芝士同蟹籽，口感更加豐富，好好味。芝麻雞翼好香脆，又唔會太油膩。每次放題必不可少一鍋蟹粥，呢到加左粟米同紅蘿蔔，所以特別鮮甜，仲可以去膩添，兩至三個人分啱啱好。最後仲有movenpick同haggen dazs雪糕揀添，食埋個雪糕真係超完滿呀！