S2 Kitchen (已搬遷) 新店位置

好似好耐都冇食過日本野，上網睇到呢一間鋪頭嘅支持度都唔錯！於是乎就去試吓啦。鋪頭位於經常拍攝嘅呢一條石板街，斜路嘅側邊正正就係呢一間小店嘅門口，好有日系小店嘅情懷。鋪面雖然唔係好大，今次我哋安排坐係吧枱嘅位置。一路望住師傅將新鮮嘅材料，一樣一樣咁樣整成餸菜擺喺我哋面前，真係特別令人期待！第一件出場嘅係十層海膽杯，真係唔可以睇小呢一個香檳杯裏面嘅海鮮同埋海膽！份量超級足料，最突出嘅就係蟹肉同埋海膽，真係好似食咗一個超級新鮮嘅頭盤一樣。之後嘅就係佢哋嘅王牌菜，S2特式火焰卷，當你一碟壽司擺到你面前嘅時候，待應會為佢進行點火儀式，真係別有一番風味！今晚我最鍾意嘅係 牛油果帆立貝洋風沙律🥗，呢一個組合真係好match！新鮮嘅帆立貝加上海膽本身鮮味已經十足，仲要配上軟綿綿 滑溜感十足嘅牛油果🥑，鮮味得黎，正好調和返食得咁豐富嘅晚餐。呢一度下次真係一定會再嚟，啱晒喜愛食海膽嘅朋友。