Mamaday (已結業)

朋友附近返工，约喺呢度食饭，开头听个名仲以为系同母亲有关，后来先至知其实系中文嘛嘛哋翻译过嚟。间餐厅好似行设计及创意路线，由入门口走廊位开始都见到好多好得意嘅装饰埋设计，呢一层其实得佢一间餐厅但差啲连门口都揾唔到。餐牌同菜式名设计亦都好特别，真系要谂左好耐先知道其实系乜嘢菜式，每个都有一个好独特嘅名，又长又难记，我最钟意句子就系冇期望，所以唔会失望。午市套餐由$100起，但沙律或汤要加钱，特色饮品又要再另外加钱，但埋单都系$150楼下，铜锣湾区唔算贵啦。头盘沙律有生果同菜，配搭得几好觉得生果好新鲜。虎虾哈Ha榄油蒜香辣扁意粉睇外表估唔到咁辣，好似冇乜落辣椒，但都有中等嘅辣度，食得辣先至好叫呢个菜，意粉炒得好干身个碟完全冇油，虎虾肉质结实弹牙。唔好抱咁大期望蒲烧鳗鱼蛋包饭，真系一个好长嘅𩠌名，加多$28可以有原条鳗鱼，鳗鱼size合理，但蛋包饭份量都算多，啲珍珠米炒得都唔错算干身，而我最钟意食的木鱼花的份量好多。紫薯窝夫，紫薯唔算甜，窝夫亦脆口。Flat White 咖啡配个中式杯，几特别，咖啡亦有水准又大杯。