玄鮨 (已結業)

最近見到呢間餐廳做緊優惠，感覺幾抵，晚市就嚟咗食廚師發板。上到嚟環境舒服，雖然唔算好大，但係私隱度都算高，坐得舒服。前菜方面，有蟹膏豆腐、酸汁雞泡魚同海鰻骨條。食嘅時候由淡味食到濃味。蟹膏豆腐食得出好香嘅豆味！酸汁雞泡魚食落爽口，酸酸地，夠晒開胃！海鰻骨條炸得脆身，唔驚啲骨拮到。再嚟係刺身七款，同樣都係由淡味嘅魚開始食起。帶子，大大舊超鮮甜！深海池魚同赤貝，食落爽口！金目鯛，魚味香！針魚，配姜蓉豉油，第一次嘗試！燒過嘅鰹魚，大大件好厚身，魚味濃，可以配蒜蓉豉油！最後就食好濃味d嘅拖羅，油香味十足，帶少少筋，正！熱食就有高野豆腐釀魚肉，配埋個蟹肉獻。食落清清地，飲埋個蟹肉獻，好香蟹味。炸物方面推介螢光魷魚，入面有汁添！壽司就有六款。伊左木，有咬口。牡丹蝦同鳥貝夠晒大隻，超鮮甜。漬物赤綠，魚香。海膽軍艦，超甜超滿足！燒拖羅，油脂豐富，齒頰留香！黑蜆湯，黑蜆偏細粒。甜品有日本柑同開心果夾餅，為晚餐畫上完美句號。