宏鮨芯 (已搬遷) 新店位置

今晚專程入黎屯門搵朋友食飯，佢話想食日本野，然後我地就搵到呢間係仁愛堂街既日本料理「宏鮨芯」試試先！呢度空間感都幾大，坐得唔會好逼，仲有個籃俾食客放袋添，服務周到！門面雖然標榜食浜燒料理，不過都有壽司刺身同埋送酒小食既！我地前菜就叫左一口炸雞，因為係岩岩炸出黎所以肉汁都仲keep到，而且雞皮同肉係連住左唔會散哂，上面仲落左七味粉更加香口，送酒真係一流啊！之後就到刺身盛合喇，刺身種類都好豐富，而且每樣都好新鮮，肉質方面都好細膩唔會有筋，食落口仲帶有陣陣魚既香甜味，值得一讚！另外我地仲叫左清酒煮大蜆，一黎到就已經聞到好濃郁既清酒味，所以事不宜遲即刻試下先。嗯～陣陣酒香帶出左大蜆既鮮味，蜆肉本身既鮮甜海水味同清酒果然係絕配！最後黎到試佢既甲羅燒喇，我地點左兩款分別係「三文魚籽甲羅燒」同埋「宏蟹噌甲羅燒」。兩款甲羅燒都充滿蟹膏，十分足料！搽落脆卜卜既多士度一齊食實在太正喇，燒香左既蟹肉鮮嫩無比，無得彈！