一樂日本料理 (已結業)

放題去得多，要有新鮮感就要試試一樂！首先佢有得加錢「蠔食」，真係任食架！加咗錢（48蚊）之後拎支旗仔，連碟放出去counter度等一下就會有專人將生蠔送上！質素都幾好，佢用嘅蠔唔係重口味嘅，清爽得嚟都清甜，肉質都有中等厚度架，而且次次都會有唔同種類嘅蠔，等蠔吧師傅發辦！推薦大家加呢個蠔package！另外都想提提甜品，呢度啲雪糕同甜食係值得期待！佢有一pack 6粒裝嘅朱古力雪糕幾得意，包裝上面提大家放一陣先食，因為要少少融先最正。當我哋跟住嚟做，第一下心諗，都好硬噃，但一咬落去就成口朱古力香，原來係雪糕版心太軟，好玩又幾好味！濃郁架啲朱古力！至於女士呢，就可以叫下佢嘅魚翅湯，夠哂熱辣辣，放題唔一定要飲凍嘢嘅！暖暖胃可以再戰幾個回合！至於傳統放題嘢，咁就梗係要數刺身，魚生好厚好好肉地，啖啖肉係正嘅！而我最愛嘅帆立貝都有質素，原隻上碟（有啲餐廳會劏半先俾你家嘛），夠哂味！刺身之外值得一提個燒茄子，好入味之餘口感都唔錯，最重要係熱辣辣！如果你都去一樂食嘢的話，可以留下肚試下，新鮮感滿分！