日悅極尚日式放題 (已結業)

本身半島中心呢個商場比較舊，一開始都有啲擔心放題嘅質素可能未必咁好。點知入到去發現呢度環境超級寬敞，比一般嘅放題多位同埋舒服得多。自助區可以自己攞唔同嘅前菜同小食，其他嘅食物都應有盡有，刺身，壽司，煮物，炸物，燒物，飯麵都有。食放題最緊要就梗係刺身啦，呢度嘅刺身擺盤都比其他放題有心機，一上枱有乾冰製造飄煙嘅效果。而刺身亦都相當新鮮，爽甜，一啲腥味/雪藏味都冇。特別推介北海道帶子，赤貝同赤蝦。壽司選擇亦都唔少，連海膽壽司都有，而且仲係幾鮮甜。個人特別推介火炙三文魚腩壽司，鵝肝帶子同花之戀。熟食方便，我認為以下呢四樣係好值得一試。帆立貝北海燒，清酒煮蜆，牛油炒鮮菌同牛肉稻庭烏冬，係日本餐廳叫嘅質素啊！飲品都有幾多選擇。鍾意飲酒嘅朋友仲可以揀啤酒清酒同梅酒，竟然都係任飲。呢度仲有任食嘅哈根達斯同moven pick 杯裝雪糕，超正！好開心我哋又發掘左一間超抵食既高質嘅放題！