Yagura日本餐廳 (已結業)

見到雜誌介紹呢間新開既日本餐廳，就係前幾日約埋朋友去食左個lunch...前菜叫左一客＂珍味拼盤＂同埋＂Oyster Shot＂，個拼盤唔係出面街d行貨小食，其中一款應該係墨魚既新鮮又特別，另外＂Oyster Shot＂就係將d蠔放落個shooter杯內，上面再加上三種唔同既配料，有三文魚子，海膽同埋有個係綠綠地既，我食左最後個款，酸酸地，幾fresh,隻蠔夠肥夠creamy，食完有想食埋其他兩款既衝動。另外叫左刺身同埋壽司拼盤各一客，用料夠新鮮係重點，份量亦都岩岩好。海鮮天婦羅拼盤，最鍾意食既係蝦，炸得脆而唔會好油膩，蝦本身亦夠彈牙，問過侍應，除左一般用黎點天婦羅既sauce之外，仲有一種叫做＂喜瑪拉雅山鹽＂既東東，味道幾得意，令天婦羅更惹味得黎又唔會好咸，推介一試。甜品叫左黑芝麻布甸同埋南瓜煎軟餅，個布甸夠特別，焦糖底下係好香滑既芝麻蓉，又唔會太甜，南瓜軟餅個texture軟硬適中，搽d syrup上去，幾好食，不過南瓜味再濃d就好。服務方面，侍應都算相當attentive，食到尾聲仲有玄米茶奉上。Overall都有相當水準。