簡.聚 (已搬遷) 新店位置

是日天氣唔錯，做完野到附近行下睇下有咩食先，見有間新餐廳開左喎，叫Granjero 簡聚，就試下佢先。天氣唔熱，加上外面環境幾靚，今日就揀坐出面啦，坐低後店員好快送上水同餐牌，午餐包餐湯及餐飲，價錢由$78起，豐儉由人。外面坐位有風扇又有風機，仲有斜路上落，店員話唔少客人帶同寵物同寵物車坐㗎，幾好喎，又多間動物友善餐廳可選擇。先上了餐湯同餐包，是日餐湯係雜菌湯，店員話主要菇菇係冬菇，再加入其他雜菇打成湯，飲一下個冬菇味又真係幾出喎，用冬菇做西湯好得意，菌味香濃好飲呀。餐包係黑糖包包，很軟熟呢，塗點牛油超正啦。主菜要咗安格斯牛肉芝士漢堡配薯條，上枱時熱辣辣香噴噴，個漢堡超大個仲非常厚身添。中間嘅漢堡扒係100%牛肉嚟，大約五成熟左右保持肉汁同肉嫩，咬多果然多肉汁，仲肉味濃郁添。麵包塗了牛油，仲夾左生菜蕃茄同芝士，呢個無得輸嘅配搭勁好味。唯一要挑剔就係個人唔多鐘意黃芥末醬，不過只塗了少量，唔影響味道。餐飲叫了杯凍mocha，啡味同朱古力味比例拿捏得好，香甜中帶少許苦澀，加上夠冰凍，超好飲。好味好味，悠閒度過下午很寫意。