秋拾米線

营业中

休息中

聽朋友講係佢屋企附近有間好正嘅米線，今日約去佢到玩就緊係想試下。點知又係排晒長龍，唯有買外賣。佢話秋拾豆花撈米線係區外人必試，我就聽佢介紹再加慢煮豬軟骨。佢自己食左好多次就轉食魚腐同炭燒豬頸肉米線，佢話同樣咁正🤣我地仲點左小食蝦多士。秋拾豆花撈米線，呢款真係好有特色，加豆花落去食，以前細個興過一排，而家真係好難搵到。豆花嘅豆味濃郁，夾埋米線食落仲好滑溜。我揀左少少辣，佢地調嘅醬汁食落非常惹味🥰，本身就配有芫荽，花生同肉碎，口感同味道真係好豐富。慢煮豬軟骨米線食落入味夠腍，但又唔會煮到老晒鞋口，就算成個撈米線算係濃味，但絕對唔會覺得咸同口渴，好滋味。魚腐米線加豬頸肉，魚腐口感滑順，好有特色。豬頸肉亦同樣好味，估唔到作為配料份量都咁多，香脆可口，好味道。朋友仲揀左薯粉底，零舍Q彈好味，份量又多，讚。小食叫左自家製手作蝦多士，蝦多士上面有大大隻蝦，夠晒彈牙，再夾埋炸多士，食落脆口又香。之前係坪洲食嘅都無呢個咁好味。朋友真係堅無介紹錯，好鬼好食，真係羨慕佢。