Mark One (已結業)

收到風話Mark One有新菜式，即刻急不及待同朋友去試一試。老闆同老闆娘一貫既好客，一去到就推介我試新頭盤(三文魚､青口､龍蝦､帶子) ，配上一個香橙牛油汁，有清新感之餘亦都中和到牛油既油膩。美中不足就係伴碟既蕃茄略嫌有少少酸。友人食既西班牙火腿併溫泉蛋，未有機會試，下次再嚟！食完第一款，馬上就嚟第二樣新菜式-特級海鮮配黑椒吞拿魚。女侍應喺上碟既時候都不忘介紹煮法，相當細心。特級海鮮口感豐富，黑椒吞拿魚好有新鮮感。不過如果個配汁相對冇咁濃會更加好。友人既三文魚他他同帶子他他都非常惹味，各有各精彩。不過當中牛肉他他就相對失色，可能因為食得比較多次，略嫌久缺新意。接住落嚟當然唔少得鵝肝。今次轉咗一個日式燒汁，同鵝肝有另類既化學作用，相當有驚喜。去到重頭戲既主菜-油鴨脾飯同龍蝦意粉。意粉完全吸收到龍蝦既精華，冇出面一般龍蝦還龍蝦，意粉還意粉。油鴨脾飯雖然用白汁煮，但都唔會太膩; 而油鴨脾唔會蓋過白汁味，令到兩者既味道平衡。整體嚟講，今次新菜式的確令到嘴刁既我都冇乜挑剔既地方