富臨薈 (已結業)

平時同屋企人飲茶都會去富臨，最近於沙田開左新店富臨薈，走創新點心路線，於是同屋企人去食晚飯。發過豬頭點心拼盤一籠有5款唔同既點心: 紫蓉豬八戒、 真係粟米包、 黑金流沙包、 翡翠白玉餃同 墨汁鮮蝦餃，款款都好精緻，味道不錯，一次過食到唔同既點心。洛神紅米金沙腸即是進化版的炸両，一碟有6件預先切好，腸粉皮用左近年興起的健康蔬菜紅菜頭染紅，包住香脆油炸鬼，入面釀左蝦膠，食落好香口，點埋用洛神花整成既醬汁，甜甜地好清新。鴻圖超脆麵似迷你版雀巢，炸麵卜卜脆不油膩，香脆可口，加左蟹肉係面，淋上蟹黃醬汁，更加惹味，而且一個個咁方便進食。沙田燒乳鴿用25日大的乳鴿來炮制，炸之前已經醃過夜，所以非常入味，唔駛點淮鹽已經好好味。乳鴿皮炸到香脆，肉保持嫩滑多汁，好食！西班牙蟹膏飯 用鐵板上既蟹膏飯上面有兩大隻蟹，大隻又新鮮，超多蟹膏，撈飯食好正，啖啖都充滿蟹膏，好甘香，蟹腳又啖啖肉，好鮮甜，超滿足！