古今二 (荃灣千色匯I) (已結業)

今日去左荃灣千色店買家品，買完嘢順便食埋晚飯。行過見到呢間個餐廳食日本嘢，好似幾好咁，所以就入左去。呢間餐廳都唔細，望落去乾淨整齊。木枱木櫈日式裝修，座位寬闊，職員安排我哋坐梳化位，坐得舒服。餐牌好多嘢食，嘢食名特別，新派日本菜色。我哋就叫左個沙律，炸天婦羅同埋壽司熟食等等。柚想蝦你沙律：名就好得意喇，裡面有菜、海草、車厘茄、蘋果、柚子、蟹子，牛油果同甜蝦等。整體配搭款式多，樣樣生果都有D，口感清新，尤其係柚子，醬油係柚子汁同麻醬，味道幾好，呢個沙律好適合夏天食。超級龍卷風：睇到個樣就知係龍卷風，係炸蝦同埋鰻魚做卷物，裡面仲配上青瓜同芝士，然後上面果D係脆片。食落仲暖暖地，味道唔錯喎，幾好味。火山：職員送上之後就同佢點火，真係變左火山。旁邊果D係鹽，用石版上。上面係蟹柳帶子鋪上芝士，下面就係牛油果青瓜蟹柳卷。咬落係暖，芝士溶左整個一齊食，口感豐富，正。雜錦天婦羅：有炸蝦，甜薯同青椒。剛炸起熱辣辣，炸粉薄薄咬落鬆脆，醬汁有蘿蔔蓉，點埋會好食D，三款都好味道。