莆田 (美麗華廣場2期) (已結業)

新年緊係要食餐好，但又唔想係屋企煮咁辛苦，一於就出街食飯，方便又靚正。行經美麗華商場，見到莆田有新年推出嘅意頭菜，一於試下。先叫一個撈起，喻意撈得起嘛，新年必食，入面有唔少材料，例如煙三文魚、蛋散、蘿蔔絲等，加上蜜糖同麻油等汁料。店員更會一邊加材料，一邊講吉祥說話，非常有意思又夠喜慶。味道唔錯，食落清新又開胃，蘿蔔絲爽脆清甜，而煙三文魚就咸香鮮味，夾埋香口嘅蛋散食，非常有口感。而椒鹽豬手炸得酥脆香嫩，外皮脆卜卜，食起嚟「喀」一聲。入面就係好軟好滑嘅筋，一入口即溶，充滿骨膠原。黃金荷葉包都好惹味，香濃嘅醬汁加上洋蔥炒肉絲，再夾入去金黃色嘅荷葉包入面。感覺有少少似炸饅頭，但就更加香口，表面嘅芝麻好香，夾埋多汁嘅肉絲，一啲都唔乾，仲啖啖肉汁。而酥炒芋芯就將芋頭條煎得香脆，加上蔥同糖炒過，食落咸咸甜甜，口感好特別。最後仲有媽祖麵線，有大蝦同蟶子，味道鮮甜，不過就比較少湯，入口似台灣嘅麵羹，麵質較淋，同一般嘅麵線唔同。