薔紅

营业中

休息中

年初五第一日返工，梗係想食餐好。自從部門年輕左，都多左出去食。今日當係同事開年飯，有人建議去食雞，一講起雞，除左KFC，在灣仔梗係薔紅。午飯時段勁多人，好在等左15分鐘已有位。一坐低諗都唔使諗，即叫5個炸雞餐，4個跟薯條，1個跟飯(最young個同事食)。剩食雞已覺飽，所以都係跟薯條好d。又等左5分鐘，5雞全到，好大堆頭。食雞，梗係要用手拎住食先開心盡興。雖然話有手套唔怕油，不過當你要撕開隻雞時，佢係熱到辣手囉。不過咁先好，香口野，夠熱先好味。見鄰桌係切埋上枱，即刻咁諗：「雞，笨唔係咁食既」。兩個醬都好味，一個酸甜、一個鹽，令燒雞更好味道。話咁快雞食完，墊底的薯條都未食，俾雞壓住有些薯條變腍，唔夠香口囉，美中不足。食完，大家帶住滿足離開，買六合彩去，可惜唔中。其實同事都話新年食太多太heavy，不過呢餐咁好味，食左先算。明年農歷年，試埋佢個豬手，橫財就手嘛。