象泰 (已結業)

聽同事講，喺新墟有一間相當出色嘅泰國菜，今日咁啱嚟開附近，就捉緊呢個機會嚟試吓佢。青檸梳打，一坐低鬼死咁頸渴，即刻嗌番個青檸梳打嚟爽一爽先，呢度嘅梳打係用玻璃樽嗰隻梳打，呢隻梳打之前喺泰國飲過，特別多氣特別醒神，喺香港唔係咁多地方有，我一直想飲番好耐㗎喇。蒜蓉越南牛油雞翼，睇其他食友啲相已經知道呢個雞翼似樣，睇吓佢面頭海量嘅生蒜同埋炸蒜就知道係幾咁惹味，雞翼外皮香脆，裏面保留住應有嘅 juicy。焗青咖哩麵包雞，見到啲青咖哩汁有如溶岩一般喺個麵包磚度流落嚟，令人垂涎欲滴，青咖哩味道香濃，特別鐘意佢上面加咗少少椰汁，令到個青咖哩帶有少少椰香，升級到唔同嘅層次。馬拉盞西蘭花炒蓮藕，不嬲都鍾意泰國菜嘅馬拉盞炒菜，通常馬拉盞都係攞嚟炒通菜芥蘭或者椰菜苗，呢度竟然有蓮藕拼西蘭花呢個選擇，梗係要清新一吓，馬拉盞嘅香，伴隨著蓮藕嘅爽口，估唔到又係另一番風味。由於每碟嘅份量都唔少，今次太飽試唔到甜品，下次再嚟試下個椰汁西米糕先。