新光酒樓 (已結業)

今晚我, 老公同埋父母一行4人去新光食晚飯, 次次去親新光我地都一定會點海鮮食, 貪佢夠新鮮夠平. 今晚每人$120. 先黎一個孖寶$68, 有菠蘿咕嚕肉及生菜炆雙翼煲(即雞+鴨), 個煲送上枱一揭開仲係滾緊, 熱騰騰果種. 雙翼都炆得好入味, 個咕嚕肉就普通普通, 無乜特別.再叫一個班腩雙味$1xx, 一味係紅棗蒸頭腩, d班腩滑一滑, 又香魚味, 又無碎骨, 用筷子可以分成魚肉一隔隔, 魚肉好新鮮, 另一味係西蘭花炒班腩, 都係一樣咁滑咁香. 仲有一個粗齋煲, 開頭以為係用南乳炆, 點知拎到黎發現原來係用上湯浸果種, 有枝竹, 菜, 豆腐pok, 粉絲等, 味道ok. 以前係新光食過一個粗齋煲, 係用南乳炆, 果個就真係正好多lu.再叫左一個蒸鮑魚仔半打$88, 嚴格黎講哩個唔算係鮑魚仔, 因為都好大隻下, 2.5吋x1.5吋咁大隻, 仲要好厚身吓, 我地同部長講話個鮑魚仔好好味, 又唔腥, 部長好好人咁解釋比我地知, 因為哩d係大鮑魚仔黎, 加上用果皮黎蒸, 絕對比其他細細隻既鮑魚仔好味得多, 佢仲話佢地都有果d蒸細細隻既鮑魚仔, 價錢$68半打, 但係味道就差好多啦.