燒味滷師 (安發大廈)

咁啱見完客喺長沙灣附近， 打算收工買啲燒味，斬料加餸返屋企做晚餐，見有唔少街坊係呢間燒臘舖外排隊等候，價錢又唔貴，好似幾好。

同收銀阿姐比完錢落好單，就拎飛仔喺門外排隊，好快就有得拎。最抵讚嘅係阿姐好好人，問佢拎多幾包醬汁都冇托手踭！

燒鵝半隻$180，價錢合理，買來比老竇食，老竇表示滿意。

鵝肉皮脆肉香，而且肉質相當肥美，抵食！

叉燒亦係我嘅至愛，呢度半斤叉燒有優惠，$39大大份，蜜汁味道香濃，叉燒有香口燶邊，瘦少少但就健康啲。

至於麻辣手撕雞都唔錯，半隻嘅份量都唔少，好足料，麻辣味好香，但唔會太辣，大人細路都岩食。