位置其實好偏，係屯門住宅區，自己作為新西人都好少嚟呢邊，係屯門人嘅帶領下先識嚟。
一到就叫咗啤酒先，台灣好興嘅果味啤酒，叫咗柚子同荔枝，好好飲，好似果汁咁，無啤酒嘅苦味，但有少少啤酒香，唔鍾意食甜嘅人可能會覺得太甜，完全唔似啤酒。
紅燒牛肉麵味道中上，牛肉同金錢肚好腍，好入味，麵好有咬口，台灣人話齋，好Q。上面有舊油豆腐串，完全係乾嘅，店員叫我哋浸透先食。浸咗好耐都唔腍，我仲心諗，點解唔煮好先上台，點知一食，有驚喜。佢未完全腍晒，仲有少少脆口，但又吸咗好多湯汁，同平時食煮好嘅完全唔同感覺，終於明白店家嘅用心。
食食下店長送咗個炒米粉比我哋，一開始我都唔係幾開心，因為我好唔鍾意食炒米粉
點知一食又係驚喜，覺得自己食緊蟹，好鮮，但其實我哋唔知自己食緊咩，因為唔係我地點嘅。問返店員先知係蟹肉明太子炒米，好好食，炒到好鬆，而且鮮味十足，今晚嘅冠軍！
小食我地揀咗個三星蔥餅，好多汁！一咬落去真係爆汁，有蔥味但唔算好強烈，皮好薄，都唔錯嘅。
最後一個鹽酥雞滷肉飯，原隻雞髀去骨咁炸，第一次食鹽酥雞要用刀叉切
個雞都係好食嘅，味道係意料之中，反而滷肉飯唔得，滷肉太甜，味道有啲奇怪，唔會再點😂
整體非常滿意！會再嚟幫襯！
