大瀛喜日本料理 (已結業)

Happy Friday 梗係要去食個放題開心下！九點去到都有唔少人係出面排隊，好彩有朋友早左去排隊，好快就入到去！一坐低就梗係即刻點左啲回本之選 — 刺身。佢都有好多選擇，三文魚，帶子，甜蝦同希靈魚。佢個蝦真係超好味，好新鮮，唔會有霉味或者雪味！另外，都點咗唔少壽司，佢啲三文魚腩好肥美，火炙三文魚都好正！食到咁上下就再睇下餐牌有咩好食。朋友點左個海鮮粥，我試咗一啖覺得好鮮甜，就即刻嗌多左一碗！跟住又叫咗個時令滋補湯，入面真係有舊花膠同埋有啲蟲草花，好足料😋令一樣前後嗌左幾次嘅就係呢個燒牛舌，佢燒得啱啱好。佢應該仲加咗牛油去燒，超級香！呢個炒蜆呢就有少少辣！嗜辣嘅朋友一定會好鍾意🤪 啲蜆完全冇沙，又好大隻好入味！食完正餐咁就梗係要試吓佢啲甜品啦，佢淨係雪糕已經有好多款，另外個甜品車仲有藍莓芝士蛋糕，紫薯蛋糕，木糠布甸，楊枝甘露...每樣都食咗一件，覺得都唔錯！今次呢個放題質素都唔錯！下次嚟好想試吓佢北海道牛乳海鮮鍋同埋雪花牛肉鍋！今次食得太飽，冇試到，有啲可惜！