泰潮 (嘉咸街) (已結業)

我特別鍾意幫襯小店，好多大集團嘅食肆已經有一大批支持者，而小店係而家呢個時間我覺得需要我哋多啲幫襯，今日就試吓呢間小店係食泰國嘢嘅，餐廳環境同裝修都睇得出花咗心思，價錢中等，二百幾蚊有一個二人餐。先來個冬陰功湯，冬陰功湯味道濃烈，材料十足，鮮蝦大大隻入口彈牙，辣味令到我特別開胃。小食拼盤新鮮炸起,魚餅同春卷都做到外脆內軟，香脆好味。主菜我地㨂左海南雞同青咖喱豬頸肉，青咖喱夠香辣，豬頸肉好入味，海南雞好滑，隻雞真係有雞味而且好嫩口，配埋油飯一齊食，正啊。最後有埋椰汁糕做甜品，二百幾蚊有咁多樣嘢食，所以話支持小店係有我嘅道理呢。