玄鮨 (已結業)

閨蜜近日被搬屋之事困擾感到很煩惱，我地都鍾情食日本菜就約佢黎連續幾年米芝蓮推介既玄鮨食餐好等佢吐吐苦水舒緩下情緒。我地預約左午餐黎食，黎到侍應熱情招待，午餐都有10款選擇，最吸引我地既當然係刺身定食同特上丼。2個定食既前菜都相同係魷魚加左點蔥，魷魚爽脆帶點甜味加埋蔥既嫩脆同香氣，為今餐帶來美好既開始。閨蜜既刺身定食包括煮物，係煮牛舌已經煮到十分軟嫩又入味，底下既蘿蔔都好正又甜又嫩。我既特上丼定食有燉蛋，好滑溜又多料。閨蜜既刺身定食擺盤精緻有心思，每款刺身都新鮮，閨蜜食得好滿足。我既特上丼起碼有11款，有海膽，Toro, 三文魚籽，金目鯛，深海池魚，鰤魚，牡丹蝦，赤貝，螺，令我最驚喜既係海膽勁鮮美又濃甜入口即化，一點腥味都無，暫時係我食過最好味既海膽。Toro好肥美，螺爽脆彈牙兼鮮甜。而底下既飯亦軟硬適中有飯香。餐後甜品係南瓜慕絲雞糕，質地輕盈唔會過甜為這餐帶來完美句號。而閨蜜食完今餐加上吐完苦水心情好番好多。餐廳環境幽雅恬靜，餐具亦精緻。侍應對各款魚生刺身都熟悉可以回答我地既問題。雖然價錢比較高尚，但間唔中慰勞下自己都係值得的。