正記冰室 (已結業)

去完九龍灣運動場，因為附近食肆唔多選擇，於是我就去咗朋友推介嘅啟業邨正記冰室。我叫咗一個下午茶餐（雞髀沙律同埋熱奶茶）。沙律我真係要大大力同大家推介，因為佢哋嘅沙律係我食過咁多間茶餐廳最好味，冇薯仔，全部係生果，啱晒我，夏天食感覺好清新。不過隻雞髀有啲炸過龍，食落去有少少乾身同埋有點偏鹹，其實我今次唔係第一次去正記食雞髀沙律，之前隻炸雞髀真係唔錯㗎。講番杯熱奶茶，夠茶味，好滑，我鍾意。我去嗰日係閑日嘅下午茶時間，餐廳大約六成滿。我慢慢坐，上吓網，咁就過咗一個輕鬆嘅下午。