一盛極牛 (已結業)

經過天文台道，見到之前飲日本酒嘅舖頭已經倒閉，轉咗一間新開嘅拉麵舖，門口大大隻字就係寫住限量150碗。入去鋪頭，位置都幾寬敞，幾似日本嘅拉麵鋪。枱面連住一張紙仔。經過20小時烹調嘅牛骨湯，肉為和牛熊本縣和王， 飼養28個月最上級a5或a4， 油花達到6級以上的大腿上肉。麵為真空雞卵麵，原材料全部嚟自日本， 增設軟水機， 做出與日本最接近的口味。寫到咁吸引一定要食，我就揀咗硬身極牛拉麵，重口味既我當然選濃味。 至於其他配料正常分量就足夠。另一樣最相似嘅地方，就係有得斟水飲。好快麵就送到上嚟， 入面嘅配料都唔少，糖心蛋，辣椒絲，蔥，紫洋蔥，紫菜，筍， 木耳。 不過最重點一定係個湯底， 豉油味好香， 一陣陣嘅牛肉味， 20小時嘅精華就喺曬裏面，至於麵質同我要求嘅一樣， 每一啖麵都掛上大量嘅濃湯，入口味道一流。 另外牛肉方面，膜薄一片，但係和牛，入口即溶，份量偏少。如果畀多少少錢，就可以揀兩份或者三份牛肉。下次再嚟食，就要食白牛拉麵，食曬兩款。