潮福蒸氣火鍋 (已結業)

蒸鍋同打邊爐都一向啱口味，因為兩種食法都能夠食倒食物最真最直接嘅味道。友人吹雞晚飯，話蒸鍋任飲任食HK$400有找有海鮮，咁抵點可以錯過，大家約埋深水埗潮福試呢個餐。攞起餐牌，原來任食係指非海鮮類別，海鮮類同乳鴿都限點一份，雖然同之前理解嘅有啲唔同，但依然感覺抵食，因為包左一份貝類海鮮，又有半隻龍蝦或者刺身拼盤，七款海鮮中有鮮鮑魚、大蟶子、大元貝及龍躉魚等高價海鮮，下面幾幅圖大家可以感受倒海鮮類幾咁新鮮。貝類海鮮彈牙，蒸完全部開口，正野！扇貝爽口，龍蝦彈牙多汁，鮑魚鮮果，自己去街市真係未必買倒咁揀手靚野。和牛片係任食嘅！有好靚油花，肉汁非常多，比某啲日本料理所聲稱嘅和牛好味太多了，我地每人食左十片以上呢！其他如肉丸、蟲草花雞、馬拉糕等等都冇話因為任食而用料差左，全部都有水準，幾款都係中上水準之作。汽水啤酒任飲，呢個都係我好欣賞項目，唔止汽水，韓國果汁類飲品，名牌啤酒都係任飲，相當抵讚。買單位HK$390，心情愉快，唔會喊揼！