掂檔車仔麵 (已結業)

黃金周，尖沙咀果然夠曬人山人海。沿住彌敦道行，邊行邊揾食。俾我地見到雞蛋仔舖隔離，原來開左車仔麵檔。門口有D餐牌，除左車仔麵，都有蒸飯喎！店內亦是人山人海，但似乎座位都幾闊落舒服，入啦！有套餐飯的，約 $100 左右。最後還是叫車仔麵。我叫左豬皮＋冬菇 +豬紅 + 蘿蔔 ，每款餸$9， 麵底就 $15。 豬皮夠大塊，爽口；豬紅偏實左D；冬菇同蘿蔔就好入味，而且好淋，正！粗麵底份量很多，有口感。 包熱飲，我叫左熱奶茶。夠熱，香濃又滑。仲叫左一個小食，係鮑汁鳳爪，鳳爪一客三隻，都係加 $8 咋 ！ 基本上仲抵過加一個餸。鳳爪唔會太爛，味道適中，有酒樓小菜的水準。朋友就叫左另一組合，有魷魚+魚蛋+墨丸+牛柏葉+紫菜；仲叫左$8 小食，滷水雞翼2隻。佢對個魷魚讚不絕口，我試左一片，真心不錯。魚蛋亦夠魚味又彈牙。牛柏葉就over cook 左少少，韌左。紫菜唔算多，但好香，生色不少。對比起雞腳，雞翼就瘦了點，而且雞腳有三隻，win !每人叫一碗，成十種餸可以share 食；埋單每人先六十幾，彌敦道喎！好抵。