Little Fresh Cafe & Bar (已結業)

今日約咗妯娌喺油麻地見面，佢帶我去間樓上餐廳，細細哋 ，生意好好， 中午時間差唔多坐滿人。我哋坐喺窗邊位 ， 雖然望住樓景， 但視野開闊 ，如果有陽光就更加好。 中午套餐有大份牛扒餐，鮮蝦意粉，配埋沙律同湯， 仲有餐飲。 有個靚仔哥哥招呼周到，友善親切， 小店就係有呢個長處，見佢同顧客之間有互動，好主動問食客對食物嘅意見， 非常之有誠意。我哋叫咗一個牛扒餐同埋一個鮮蝦意粉餐 share 嚟，牛扒非常之大份，配鮮炸嘅薯條，仲有bb紅蘿蔔， 車厘茄同埋椰菜仔，淨係見到個賣相就已經夠曬吸睛，👀 牛扒煎到七成熟，唔柴，多汁，都幾滋味，加啲芥辣， 提升食慾， 紅蘿蔔蕃茄同bb椰菜都好新鮮，鮮紅嫩綠，平衡葷素。 鮮蝦 意大利扁意粉， 有三隻好大隻嘅靚蝦， 用茄汁蘑菇煮嘅扁意粉， 依依韌韌， 好好食， 三隻大蝦非常鮮味， 真係超值。 食完兩份大餐，仲有一杯靚咖啡同埋一杯靚檸檬茶飲 ，性價比超高 ，唔怪得呢度咁多人幫襯， 下次嚟油麻地都要再試過，試下其他菜式。