爆爆鍋 (已結業)

台式火鍋食得多，呢間以爆炒鍋形式為賣點，店員會即場用砂鍋炒香鍋底材料再加入自選湯底，滾起後記得要先飲湯，再打邊爐！主菜方面以肉類為主，另可加配小食同飲品，打卡又好味😋湯底要咗爆炒櫻花蝦鮮同燒酒烏雞鍋，前者較清淡，後者充滿酒香氣，記得要攞定相機打卡！主食有海鮮拼盤，有三大隻蝦，咬落爽口彈牙，仲有魷魚、蜆同鯛魚片，感覺都幾鮮甜。安格斯牛小排呈現粉嫩色，入口嫩滑，試試無妨。另外會搭配飯或者麵，寬粉吸飽湯汁，食埋啱啱好夠飽。小食有鹽酥雞同魷魚，炸至酥脆可口，有夜市風味，性價比高。飲品有蘋果醋QQ冰紅茶同真心橙意翡翠，大大杯，夠解渴。自助區有八款蔬菜同埋醬汁可以自己調配，佢話呢度嘅蔬菜都好新鮮，尤其是係粟米，完全冇渣，而且超級甜，好想知喺邊度攞貨😆 醬汁方面都幾有驚喜，有沙茶醬、腐乳醬、芝麻醬等，好適合點住嚟食。