築地番本日式放題 (已結業)

我唔太鍾意食放題, 一嚟眼闊肚窄, 二嚟總覺得任食質素比較差。但屋企人偏偏鍾意任食, 呢晚唯有同佢地嚟番本食個夠本。一嚟到覺得餐廳幾大幾舒適, 冇乜壓迫感, 食物種類都多, 仲有蒸氣火鍋。出面亦有甜品同飲品任攞!中華沙律帶點辣, 爽口開胃! 毛豆夠稔, 我食左唔少。蘿蔔炆牛腩就一般, 冇乜牛鮮味, 而且牛腩有啲韌。之後當然要食刺身回本! 刺身種類多, 除左三文魚、鱲魚, 仲有甜蝦同北寄貝, 各樣都新鮮, 唔錯。呢個時候火鍋水滾啦, 打開蓋, 就可以放野上去蒸, 唔同平日放落水咁。帶子同蝦都好新鮮, 我食左好多! 肥牛就脂肪太多, 食落太肥膩。之後就食左芝士燒蠔同燒帶子, 芝士連埋沙律醬, 酸酸地好惹味。燒鯖魚夠juicy, 肉質有咬口, 唔錯。最後梗系唔少得甜品。奶凍好滑但甜左少少, 焦糖燉蛋就好嚡, 都系雪米糍好食d! 唔鍾意食榴槤既我大膽試左啖榴槤雪條, 好濃既榴槤味好似食緊榴槤咁, 如果鍾意食榴槤既話應該好鍾意呢。呢間放題店種類多, 仲有蒸氣火鍋, 甜品任食, CP值幾高!