小明珠 (已結業)

又到星期五，約左朋友來到藍田打波，打完波梗係要醫肚，誤打誤撞來到了"小明珠"。餐廳位於啟田道，由地鐵站上黎只係需要幾分鐘，相當方便。招牌小籠包 :一籠有四件，外皮好薄，夾嘅時候要非常小心，內裡爆多汁，味道好鮮甜，一人兩隻真係唔多夠喉。 生煎包 :生煎包即叫即煎，外皮煎得香脆，內餡肉嫩多汁，好味道。酸辣湯雲吞麵 :酸辣湯不嬲都係我最愛，份量都幾大碗，上海麵入口彈牙，雲吞皮薄，菜同肉比例唔錯，配埋酸辣湯味道好夾。湯麵餐附送冬瓜茶，加８蚊可轉豆漿，豆漿味道唔太甜，豆味濃郁。豆沙鍋餅 :一碟有八件，細細塊一口一件剛剛好，豆沙鍋餅煎得夠脆，中間嘅豆沙唔會太甜，做甜品岩岩好。埋單每人80蚊，非常抵食，算係值得支持嘅小店。