御前大江戶日式料理 (已結業)

觀塘工業區，lunch時間人山人海，搵食艱難。同事好鍾意嚟呢度食魚生飯，因為份量超級大，而且座位多，唔駛等位，可以舒舒服服食。魚生飯選擇都幾多，如果咁都揀唔啱，都仲有自選組合，梗有一款啱心水。我今次就叫咗個【溫泉蛋火炙丼$88】。跟餐送一客麵豉湯，加$4就有飲品。一上枱果然大份，可以用巨型嚟形容。面頭鋪滿火炙三文魚同火炙蟹柳，仲有三文魚籽。最頂就係溫泉蛋。下面係一堆飯，最底就仲有啲玉子同青瓜。三文魚比較薄，不過蟹柳就大大條，而且唧咗啲沙律醬喺上面，再加上少少火炙出嚟嘅香味，食落好滋味。可能今日狀態差啲，最後我食唔晒碗飯，有啲浪費⋯⋯雖然個飯一流但服務就真係差。餐廳係用夾單形式準備食物，我雖然早早落單但等咗差不多半個鐘先有得食，呢個都算，但追單嗰陣店員只係悔氣咁講「等吓先啦」，語氣仲衰過某澳洲茶餐廳。我唔係要你say sorry，只係有返少少禮貌或笑容都好丫，我係嚟食飯唔係嚟受氣囉。