九份•十分 (河畔花園) (已結業)

之前都去過九份十分係上水既分店，一直都好掛住佢既鹽酥雞。今日係沙田踩完單車經過依間餐廳係沙田既分店，緊係唔可以錯過機會食番餐台灣野啦！七點半去到餐廳唔係太多人，唔洗等位就入得。可能因為岩岩做完運動，所以個人特別口渴，一拎到餐牌就即刻睇下有咩特色飲品。最近天氣開始熱，所以想飲下d沙冰類既野。我自己就叫左一杯叫做暗黑系甜心既Oreo沙冰，而友人就叫左個叫做青青草原既抹茶沙冰。等左無耐d小食就開始上枱。首先上菜既係涼拌四季豆，少少辣味幾清新。份量都唔細，所以幾抵食。跟住黎既就係萬眾期待既鹽酥雞！我個人幾鍾意佢有6款口味既調味粉提供，可以根據個人口味黎揀。我自己就最鍾意咖喱同埋辣味，食落幾香口。另外值得一提既就係d雞好肯定係即刻炸，我太心急想食仲差d辣親條脷～哈哈！主食方面，我地就叫左一碗紅燒三寶麵同埋綜合滷水肉燥飯。三寶麵有好足料既牛腩、好重骨膠原既牛筋，同埋幾入味既牛肚，岩晒我友人依位牛魔王。至於肉燥飯都好多配料，最緊要係個肉燥同汁唔錯。我地最後仲有少少肚餓，所以特別叫左個溶岩芝士雞。雞件幾脆，加埋超濃郁既芝士忌廉簡單係一流。最後埋單價錢唔係特別貴，仲要食唔晒，整體性價比真係唔錯！