大瀛喜日本料理 (已結業)

今日同朋友慶祝生日，朋友話之前食過呢間放題好抵食，於是黎encore。一入到餐廳就見到兩個飲品柜，飲品選擇都好多，果汁汽水啤酒有超過二十款，鍾意飲酒嘅仲可以加錢飲清酒。由於我地成八點幾九點先入座，已經勁肚餓，一坐低就瘋狂咁叫野食。好彩呢度嘅上菜速度好快，入左紙仔唔夠五分鐘就有野食喇。第一round梗係叫刺身先啦，有成十幾款選擇，最正係三文魚，夠厚切又肥美，甜蝦都好大隻又好鮮甜，同朋友每人起碼食左十隻。另一抵食之選係海膽手卷，有甜味唔會腥，而且細細件可以一啖一件都得，飯量少食多幾件都仲得。蒜香一口牛好夠淋，好惹味好香口。豉椒炒蜆又係值得推介，d肉夠大粒又無沙，唔會淨係得d殼。天婦羅就叫左炸蝦，蟹柳同甜薯，上碟時仲熱辣辣，證明係即炸。蝦肉夠彈牙，炸粉都唔算太厚。芝麻雞翼又係新鮮炸起熱辣辣，夠晒香口，外脆內軟。最後仲試左個黑豚響鈴辣酒鍋，食落有d似泡菜鍋，酸酸辣辣幾開胃。值得一讚係侍應見到我地摵蝦殻隻手污糟左，好細心咁俾左包濕紙巾我地抺手。