美味佳 (已結業)

黎到紅磡食宵夜又點少得美味佳? 價錢中肯選擇又多，雖然通常都比較多人要等下位，有時冇得揀仲要坐出面，不過呢間野D串燒真係值得一食既。 蛋炒腸粉係我既最愛，雖然普通一碟家常菜，好多人都識整，但係美味佳就係可以整到腸粉外脆內軟，每次黎食都keep到水準。不得不提既就係佢既雞全翼、雞腎同埋牛油金菇都係整得非常之咁好食。雞全翼同雞腎燒得岩岩好唔會燶，外脆內軟而且D肉仲係好嫩，表面再加上左一層薄薄地既椒盬吊味，真係會令人食上癮! 食串燒咁熱氣就緊係要食番D菜平衡下啦，牛油焗金菇就絕對係我既首選喇，呢度既牛油金菇全部都係即叫即整，送到上你枱就岩岩好D牛油既味道融入哂落D金菇度，鍾意食呢味野既朋友真係唔可以錯過。 唯一美中不足既係呢間鋪頭既客人真係太多，好多時就算你有位坐都仲要等一段時間先有得食，想食既朋友就真係要俾D耐性喇。