古琴雅苑 (QRE Plaza)

营业中

休息中

大家有睇開我嘅Instagram，知道我係一個北京烤鴨嘅狂熱分子，上兩個月屋企人生日嗰陣特登去咗間舖頭食北京烤鴨，冇記錯好似三百零蚊就有一隻原隻嘅北京烤鴨，同坊間其他餐廳比較佢的確好平，但係味道係點呢？咁你就要睇落去啦！我哋叫咗原隻古琴酒糟北京烤鴨，但係我哋落order嗰陣，店員竟然同我哋講其實呢一款唔會有酒嘅香味，仲推薦我哋食返原來嘅北京烤鴨，不過我哋基於想試嘅原因所以都叫咗。佢哋既烤鴨係鴨皮連鴨肉嘅，另外都會有一小疊最香脆嘅鴨皮部份當小食比大家食，不過可能一分錢一分貨既關係，我覺得鴨肉嘅味道唔係好香濃，而且我覺得有啲攤凍咗所以食食下會有浸鴨嘅騷味走出嚟，坦白講我有少少失望既，但係呢個價錢嘅話算不過不失啦。至於其他餸菜方面我哋就覺得略嫌有啲貴，分量亦都比較少，意大利黑醋骨同上湯津白既味道我覺得還好啦，比較推薦嘅都係黃魚烤年糕，味道香濃而且黃魚口感唔錯，年糕亦都好入味。如果你純粹想食北京烤鴨嘅話我覺得幾好，但係如果同屋企人食嘅話我就覺得可以揀返之前我食嘅其他舖頭啦。