厚福館 (黃埔天地) (已結業)

無晚市堂食，唯有晏晝去食想食嘅野啦，好耐無打邊爐，朋友話佢個邊開左新餐廳，有個好抵嘅午市火鍋套餐，就黎試下先。三點幾黎到都爆場喎，咁高人氣一定係好野啦。好好彩有張卡位坐，兩個人好濶落，張枱高度啱啱好。快快睇下餐牌食咩先，左揀右揀最後決定點牛同豬餐。跟餐送解茶一支，可以加錢轉汽水、啤酒等。朋友點了老火菜乾湯，真係好香菜乾味，值得飲嘅湯底。自己點左醒胃酸菜湯，酸酸辣辣好惹味。朋友點的手切牛魔王餐，賣相好靚喎。牛肉好靚，入口軟嫩又重牛味，正呀！再加錢轉了有機蕃茄粗麵，食落真係有蕃茄味，粗麵口感不錯。自己點左天蓬元帥餐，豬肉餐賣相都不錯。有豬肋條，豬頸脊，粉腸，肉餅同肉丸。其中肉丸有兩款味，鹹蛋黃同梅菜，前者咬開流心㗎，粉粉地咁好得意，後者鹹鹹地，慢慢又有啲梅菜甜味走出黎，好食喎。麵食方面揀左人氣嘅上海陽春麵，陽春麵配酸辣湯啱啱好，正。另外加左生菜＆萵荀，食番啲綠色植物先得嘛。仲加左份炸魚皮，香香脆脆正呀。名碼實價，加埋一唔使一百蚊個人，食材優質湯底好味，絕對抵食過大xx個啲一人一鍋啦，唔怪得咁多人黎食。