抖蛋馬來西亞古早味蛋糕 (啟德) (已結業)

每一個地方都有傳統甜點， 而 呢啲傳統甜點 去到第二個地方，配方可能就會有少少唔同， 演變出 食物的不同層次 。 例如古早味蛋糕咁，大家都係蛋，糖，麵粉等等， 但係配方同配料唔同就會做出唔同感覺嘅古早味蛋糕。 今日經過啟德， 見到有來自馬來西亞嘅古早味蛋糕， 就係因為呢個原因， 想試下唔同地方嘅古早味蛋糕， 咁又買咗兩件蛋糕返屋企。抖蛋係來自馬來西亞嘅古早味蛋糕， 除咗有原味之外， 仲有鹹蛋味，爆漿芝士味， 而且仲有馬來西亞榴槤味添。 今次就買咗原味同埋鹹蛋味。馬來西亞原味古早味蛋糕， 蛋糕模有坑紋 ， 所以這件蛋糕睇起上嚟就會有一格格可以方便而易切。 切開蛋糕裏面 ，見到一層層， 咬一口，蛋糕鬆軟濕潤，而且蛋味香濃。至於鹹蛋味古早蛋糕， 呢度啲鹹蛋留晒沙爆曬漿咁， 放到入口都覺得咸蛋好似火山爆發， 充滿所鹹蛋鹹香嘅味道同埋雞蛋本身嘅濃郁， 最重要係呢到的古早蛋糕熱食又得，暖食又得，放喺雪櫃雪凍食又係另一種滋味， 咁先至係真正嘅古早味蛋糕。