叁淥火鍋 (已結業)

今日來到元朗呢邊搵食，揀咗呢間舒服企理嘅火鍋店，餐廳空間感十足，星期五晚市座無虛席！雙拼湯底－芫茜皮蛋拼韓式泡菜湯，職員介紹泡菜湯嘅醬料係師傅自己炒嘅，湯底好香帶微辣，就咁飲都好正！另外一邊嘅芫茜湯底芫茜味好出，芫茜控大愛～金磚豆腐粒，外脆內軟，配埋喼汁食好開胃！牛魔皇（牛頸脊，牛舌，牛胸油，黑柏葉）1碟牛滿足晒所有牛魔皇！上菜時會有乾冰效果，打卡一流～牛頸脊牛味十足，超推介！牛舌口感爽彈黑柏葉大大舊都唔會韌牛胸油比較少有，食落其實似爽口嘅牛脂肪，都幾有特色！即炸魚皮，完全唔會有油益味，好新鮮！浸幾秒掛湯又香口！手打四寶丸（鮮蝦、墨魚、牛肉、鯪魚）全部都係手打，調味同口感一絕，特別係墨丸同牛丸，前者食到啖啖超足料墨魚，後者食到牛丸嘅鮮味，唔會係食粉+味精嘅感覺～手包餃拼盤（白菜餃、韭菜餃、紫菜餃）各2隻全部都脹卜卜，餡料偏向多肉，紫菜餃味道較突出，個人推介！田園菇菜拼盤白桃沙冰、益力多沙冰打邊爐一流，好快encore叫多杯！