撈得囍．麵檔 (已結業)

近排想影下IG相，於是就一日之內走勻華富／觀塘／鰂魚涌，諗起都覺得傻。最後一站黎到牛頭角樂華南邨，求其影完就揾地方開餐了，因為真係頂唔住肚餓。近近地就過左冬亭睇下有咩食，就見到呢間幾有排檔色彩嘅麵鋪。坐底見選擇不多就點左個清雞湯米線跟配芽菜／滷水雞翼及蝴蝶腩。一開始覺得芽菜要加錢有點唔抵，但上到黎發覺個芽菜真係好多，食左兩撮後都仲有好多，哈哈。滷水雞翼煮得好腍食落唔會過咸都算唔錯。但個蝴蝶腩就好味了，炆得好鬆化之餘筋位仲保持到少少咬口，比普通牛腩口感更正。而米線麵底係偏腍嗰款，可能係咁令佢更吸個雞味。雞湯好清唔會好油膩，所以食晒成碗都唔覺滯。因為口淡淡嘅關係點左個榴槤波波過下癮。外皮都夠脆而入面嘅榴槤餡都香不過就甜左啲啲。對於接近成年都無食過榴槤黎講，個味道仍可接受。埋單唔計個榴連，只係40零蚊都算係咁，最緊要係夠就腳，係停車場影相打完卡就可以醫肚，一舉兩得。