御前大江戶日式料理 (已結業)

呢間餐廳向來都好出名日式放題，除咗多選擇之外，最特別嘅就係有好多唔同海鮮畀我哋燒烤。好彩我哋預先book咗位，如果唔係一定大排長龍 。一入到去間餐廳就已經聞到陣陣嘅燒烤香味， 間餐廳的服務好好，我哋雖然係兩個人，但係佢畀咗四人枱我哋。我哋今次叫咗好多嘢食，刺身已經有好多唔同款式，鮮蝦都好鮮甜。而壽司我反而覺得最值得讚賞，有好多唔同材料嘅配搭，例如柚子配鮮蝦 ，黑松露配帶子， 鰻魚配玉子等等，全部都好高水準好好味。全晚嘅精華就喺燒烤嗰度 ，放題會贈送每人一隻鮑魚，一隻蠔，一隻聖子， 同埋一隻大扇貝。 仲有兩個人可以有一隻蟹添! 我最欣賞嘅就係鮑魚， 未食已經見到隻鮑魚好大隻 ，同埋啲工作人員有教我哋點樣燒鮑魚最好味，喺燒嘅過程之中我哋仲加咗少少清酒同牛油 ，燒到啱啱熟透食落去啖啖鮮味， 真係大滿足! 除此之外，我哋仲可以任叫蝦 ，蜆，青口等等嘅嘢食黎燒。我哋之後叫嘅嘢食都多到數唔曬，包括有免治雞肉串，牛舌， 鰻魚全串等等 。我哋仲叫咗個三文魚湯同埋海膽撈蛋飯添!海膽撈蛋飯真係好美味，當中仲有啲魷魚喺裏，幾有有口感，而呢個湯底非常之香。飲品同甜品好多選擇， 飲品我仲揀咗最鍾意嘅蜜瓜梳打添!