壹碗麵 (已結業)

上星期尾食過佢既外賣溏心蛋之後，實在好掛住，咁岩琴晚又有機會去開北角，決定去試下其他食物之餘最緊要就係搵我既至愛 -- 溏心蛋！店舖位於北角和富道，呢條街俾我既感覺都幾奇怪，事關呢條街出哂名係車房街，但偏偏又有好多好味既食物係呢條街出現... 沿途行黎時見到勝利小廚、呢間舖再行前少少就係阿鴻小吃... 莫非呢度專出好味既野既﹖行到門口，其實門面好細間，打開趟門，隨之而黎既係一個笑容可掬既亞姐，好有住家feel咁叫你「隨便坐丫」，第一個感覺已經好舒服，好有親切感~ 好可惜店內位置不多，可以揀既位都有限~ 坐底左之後，第一件事就諗住叫我最想食既溏心浸酒蛋同埋酒糟釀大腸，點知亞姐話d蛋未入味，要起碼1個鐘之後先有！而大腸則係週末先會有！ 咁我一心諗住黎食呢兩樣都無... 好失望...係亞姐既極力推介之下，叫左家鄉炸春卷、酒糟炆豬腩肉撈粗麵同埋巨峰提梳打。係我等候既期間，另一位亞姐無端端拎左一個細碗過黎，笑笑口咁同我講「老闆知你專程黎食，請你幫佢試下味喎」嘩！有無咁好人丫﹖！ 上次食個陣係外賣，所以唔識食，亞姐教我原來要先將隻蛋係中間切開，然後將個蛋漿撈埋d酒一齊食，於是我急不及待咁試下...