香港永年車仔麵茶冰廳

营业中

休息中

假日嘅新城市廣場真係爆多人，揀咗門口較入嘅永年食晚餐。裝修有啲懷舊嘅香港風情，仲記得呢啲特色鐵閘，場內亦播放住90年代耳熟能詳嘅歌曲。見到好多人食鐵板餐，一於叫返個，我哋都好耐冇食。周打蜆肉魚湯有蜆肉、薯仔，質地濃稠幾鮮味。招牌港式牛尾羅宋湯酸酸地夠開胃，入面有軟腍嘅牛肉，真係幾好飲。餐飲加錢升級紅豆冰同菠蘿冰都係細細個去冰室成日飲嘅，我就鍾意呢個抹茶紅豆冰，抹茶茶香減低咗紅豆冰嘅甜度同膩感，更加好飲。鐵板餐嘅主角出場！美國極佳級封門柳肉質唔錯，鬆軟易切開，牛肉特別濃郁。叫咗五成熟，再加埋鐵板嘅熱力，熟成度啱啱好。雜扒餐有美國頂級西冷扒、西班牙熟成有骨白毛豬扒、日木名古屋雞扒，係高級版嘅鐵板餐。淋啲黑椒汁上去，熱騰騰，香味四溢。三款肉最鍾意係雞扒，肉質超級彈牙，肉嫩多汁。配搭埋蔬菜，均衡營養。