合記茶餐廳 (已結業)

星期六同朋友去開白田村工作，我哋兩個都未食野，就梗係泊底部車喺合記茶餐廳門外，入去整返個茶餐食下先啦！店內陳設仲好80 年代feel, 包括各位待應大哥既服務態度都係10 年如一日，令人好有人情味！嚟到茶餐廳最好就梗係叫返個茶餐，而且呢度選擇亦唔係太多野揀，主打幾多茶餐，再加幾樣炒粉麵飯！我就叫左個沙嗲牛肉麵加餐蛋同埋多士！沙嗲牛肉麵本身都夠味，不過加d辣椒油就更好味，牛肉整得軟稔，沙嗲醬都入晒味，反而個麵又整得稔過頭，唔太彈牙，不過雞蛋既生熟就處理得宜，非常滑溜，一咬d蛋汁慘晒出嚟！ 餐肉都係厚切，而且煎到好香口！其實後上既多士比個麵有過之而無不及，厚，多牛油，加少少糖已經係人間極品，一咬入口嗰陣香濃既牛油味，令我急不及待要食埋下塊！奶茶都係中規中矩，有茶香，有掛杯！ 呢度食茶餐比起外邊，性價比極高，$31就搞掂，又方便睇車！ 揸開車既朋友不妨嚟試下！