沙拉姆咖喱屋

营业中

休息中

今日陽光普照，一早同老公由荔枝角深旺道行去油麻地拍下拖，貪成條路無人又濶落，行到油麻地都差唔多十二點食晏時間，走去廣東道搵食，見好多舖頭未開，唔知係唔係專做夜市？我哋見到間印度餐廳，午市套餐大大個牌向門口，價錢合理，由$48-$70，印度哥哥見我哋望望下，好好笑容咁招呼我哋入去坐，坐落見大餐牌內D食物都唔貴，所以決定散叫，我哋叫左炸魚、白咖哩雞、印度蒜茸烤餅及印度牛油煎餅，等左一陣，印度哥哥落左籃好似疍卷狀嘅印度薄餅及一碟仔綠色汁，佢話係送嘅餐前小食，餓餓哋，我哋緊係開心啦，條薄餅又薄又脆，配埋佢附上酸酸地辣辣地嘅綠色汁，好醒胃；食完餐前小食，即上炸到熱辣辣嘅炸魚，食到魚塊之餘，內加左小小菜類嘅嘢，令到炸物無咁油，個汁酸酸甜甜，值得一試；我最欣賞佢個印度牛油煎餅，一層層香酥及鬆化口感，空口食或配上白咖喱雞都好好味；全餐食到飽飽，仲唔駛加一，真係滿足。