青花 (THE FOREST)

今日去咗波鞋街附近睇一睇運動鞋，天氣突然轉涼，肚仔即刻咕咕野，就近去附近搵嘢食！酸辣鳳爪沙律呢個前菜相當開胃，鳳爪甩骨得完整，份量亦都唔少，配上青豆、青瓜、大蔥、生洋蔥，整個口感非常爽脆，加上酸酸辣辣嘅醬汁，特別滋味。路邊炭火豬腩生菜包生菜包一般都會用上肉碎，但餐廳選用豬腩肉切條，口感更佳。豬腩肉唔算好肥，肉質爽嫩，炒上蜜糖再點上泰式醬汁，配上生菜油膩感絕對唔會太高，惹味爆棚。泰式虎蝦金邊粉擺盤用心，虎蝦size誠意十足，每條金邊粉都沾有橙紅色嘅色澤，醬汁帶甜，建議可以落多少少青檸汁作中和。香蕉煎餅泰國必食嘅甜品之一，定價中上，但食第一啖就覺得絕對值得花費！呢度嘅香蕉煎餅做得香脆可口，外皮帶點煙靭，裏面嘅香蕉肉綿得黎相當清甜，染上朱古力醬足見邪惡。龍鬚三色冰奶蓋絕對係吸引眼球嘅飲品，面頭有三色泰國龍鬚糖，脆口脆口的，奶蓋鹹香又順滑，底部更加有粉圓，馬蹄爽，口感極具豐富。