百樂潮州酒樓

营业中

休息中

一向都好鍾意百樂潮州酒家嘅滷水，特別係佢嘅鵝肉片同埋鵝肝鵝腸，不過散叫菜單比較貴，其實佢有好抵食嘅套餐，有滷水食品作前菜、燉湯，同埋兩個小菜任揀，都係幾百蚊，抵食。今次我哋就叫左呢個二人套餐，選咗滷水鵝片做前菜，佢哋嘅滷水真係無得輸，所以都唔多講啦。今次想講講佢個湯——鹹檸檬燉鴨湯。湯底清純略帶鹹檸檬嘅鹹鹹酸酸，非常醒胃，另外鴨肉嫩滑，而且是整個鴨髀，一壺湯足夠有四大碗，作為開飯湯水非常合適。我仲叫咗兩個小菜，就係這一條檸檬蒸烏頭，烏頭肉質鮮嫩，配合少少檸檬，真係令人垂涎三尺。還有這個川椒龍鳳配，即係以川椒炒海蝦和雞肉，非常惹口，蝦肉彈牙爽口，雞肉嫩滑鮮甜，而且份量不少，蝦肉有四大隻，雞球都有八大塊，真係非常抵食。其實佢仲有好多經典小菜任君選擇，下一次一定要再黎試一試其他菜式。