大和牛石燒專門店 (已結業)

今日約咗朋友去九龍灣攞嘢，記得上次喺荃灣食石燒感覺唔錯，上網搵到響德寶商場入邊有一間石燒餐廳就去試吓啦！呢間餐廳位於商場入邊，佢哋嘅餐牌主要分開三大類，包括左石燒牛套餐、鐵板牛肉或豬肉飯，同埋漢堡包套餐。我哋就叫左紐西蘭天然牛肋條($90有300 gram)同埋雙層芝士和牛漢堡（兩塊150 gram嘅厚牛肉），牛肋條總共有四條，嗰塊石頭夠哂熱渣渣聲，加上牛肋條煎咗好多油，所以記得放喺碟仔上面分開加熱，如果唔係遲食嗰啲就會好熟，牛肋條好有咬口亦都肉味十足，加上出邊仲可以自助式攞麵豉湯、沙律同埋白飯，所以一定夠飽。另外雙層芝士和牛漢堡，入邊嗰兩塊烤牛肉好厚又juicy唔乾，加上芝士食味道唔錯，同埋佢哋嘅套餐可以加$15配薯條同埋罐裝汽水，套餐性價比高，下次可以再試吓其他款式。