船渦

营业中

休息中

一直好想嚟試呢啲一人海鮮鍋，最正係佢仲要係粥底，吸收晒所有大地精華，價錢份量非常相宜，佢有好幾款唔同官階嘅套餐，個名仲好有趣。佢有個Menu教你每樣食品要蒸幾耐，好彩有呢個教學，唔使諗，佢個爐仲可以校定時，夠鐘會響提你要食嘢啦！自助調味料九品芝麻套餐 - $218呢個係最平嘅選擇，但都包左大部份想食嘅海鮮，首先會有刺身同兩粒章魚燒，刺身都算新鮮，章魚燒應該都係即食，但味道尚可。海鮮方面有：白蜆、蝦、 鮑魚、鮮魚片、大蜆，全部都好新鮮，會用冰震住。肉類可以三選二，揀咗雞腿肉、美國肥牛，雞髀肉好滑，仲有少少調味，有驚喜。三寶丸係有餡豬肉丸、漿爆牛丸同花枝丸，幾高質。時蔬拼盤乜都有啲，尤其娃娃菜，蒸完超級清甜。粥底係南瓜粥，蒸完嘢食就可以叫店員幫你落粥底，大概滾3分鐘就食得，粥唔需要加任何調味，都好夠味，由夠棉滑。仲有甜品雪米糍送。八府巡按套餐 - $388呢個係中間價錢嘅套餐，都會跟刺身，但就會跟埋芝麻雞翼，雞軟骨餃子，炸物都脆卜卜，幾惹味。海鮮方面，呢個餐多咗龍蝦半隻、元貝、時令海鮮、同蟶子皇/蟹，海鮮會高級啲，但我覺得都好值，尤其龍蝦同元貝，兩樣都係我至愛，蒸完仲有超級清甜嘅汁，好正。