Bellevue Bar and Grill (已結業)

開心星期五要食個悠閒午餐，黎到二十三樓高嘅餐廳，一出Lift就見到大大幅壁畫，而入面係全落地玻璃，望住出面繁忙嘅街道，顯得更寧靜悠閒，環境一流。而係Openrice 訂枱有主菜買一送一優惠，主菜分量比較少，必須配自助先食得飽，但味道好好，叫左兩個主菜加自助，每人平均$120。自助嘅選擇唔算好多，有火腿青瓜蕃茄仔幾款生菜幾款醬汁幾樣沙律配料。湯就只有南瓜湯，味道香濃，口感好滑口。仲有幾款生果揀，新鮮多汁。而甜品就只有三款，但相當有水準，而Brownie比較特出，朱古力好濃，口感偏實但夠濕潤。＊芝士伴三文魚柳茄蓉醬 $58三文魚中間好嫩滑，煮到岩岩熟，無煮過頭變鞋，中間保持到原有魚油濕度，一啲都唔乾，而面嘅芝士香濃，底嘅魚皮煎到好脆，難得可以吸引到我食魚皮。揀左配薯蓉，滑口唔乾唔會漿住，好好食，係分量少左啲啲，幾啖就無哂。＊香煎海鱸魚伴檸檬忌廉汁 $78都係面頭煎到脆卜卜，入面中間保持滑又唔乾，加上檸檬味清新更能食到魚原味。