尚上下夏 - 養生雞煲火鍋 (已結業)

一大班朋友最好約打邊爐，一齊烚吓烚吓傾計。之前已經試過呢度嘅雞煲覺得唔錯，今次就同朋友嚟試吓普通嘅淨湯底火鍋。呢度一共有八款湯底可以揀，仲可以要鴛鴦鍋。今次我哋就揀咗瑤柱群翅雞湯。湯底非常足料，飲落清甜，我哋每人都飲咗一大碗先正式開始打邊爐。呢度用咗大排檔嘅格局，但係絕對衛生乾淨，材料仲非常新鮮。首先要咗個餃子拼盤，有鮮蝦雲吞，韭菜豬肉餃，同埋魚皮餃三款。四個字可以形容曬，全部就係皮薄餡靚！然後要咗份響鈴，每條都好大份！即炸嘅響鈴超脆，唔會有油益味，淥幾秒就好啦！跟住要左份鬼馬墨魚，其實係將墨魚滑釀咗喺油炸鬼上面。油炸鬼同響鈴一樣都係好新鮮好脆，墨魚膠亦非常之彈牙，上面仲有少少蟹子增加口感，好好食！打邊爐又點少得牛肉呢？我哋要咗碟手切頂級安格斯肥牛，脂肪比例分布平均，牛肉味濃，而且就算要細碟份量都好多，好抵食呀！最後要左d澱粉質，稻庭烏冬好滑，配埋雞湯食一流。